يا لله ياللي عباده تطلب أفضاله |
نطلبك رحمتك بأولها وتاليها |
ما غيرك أجد ليا احتجنا رجعنا له |
يا رازق الأرض واللي ساكن فيها |
انك تعجل علينا الوسم بخياله |
بأول لياليه وبروقه تراعيها |
ينشي من القبلة ومزنه ينشاله |
وسحبه تراكم ورعاده يخاويها |
تسوقه الريح ثم يهل هماله |
أمطار خير ورب البيت معطيها |
من أول الوسم تمطر لآخر لياله |
خمسين ليله وهتانه يساقيها |
الأرض تروى وينقع فوقها زلاله |
والاودية تشتبك والسيل غاطيها |
على الوطن يضفي سهوله مع جباله |
وسم على المملكة ويعم أراضيها |
ينبت منه كل عشب بمحتوى أشكاله |
جميع ما الله مر به تاجده فيها |
وكل يربع ويفرح حول منزاله |
وتنسى المحاويل ما به ناس تطريها |
الأرض روض خضر ومزونها ظلاله |
تونس اللي على الأقدام يمشيها |
يقطف من أزهارها ومريح باله |
وهموم الأيام تاركها وناسيها |
شوف الحيا يفرح الإنسان لاجاله |
عساه ينزل على الديره ويحييها |
يالله حقق كامل لعبدك كامل آماله |
ما غيرك أجد مطاليبه يلبيها |
حمدي ماطر العوفي - الرس |
|
