يا درة ما تقبل الخدش واللمس |
من فكر واحساس ومشاعر تمول |
تبعد وتجلي كثرة الهم والعمس |
موضوعها واضح لا يمكن يوّل |
اشوف هرج اليوم ماهوب مثل امس |
مدري وش اللي غير الهرج الاول |
الهرج الاول راح مع طلعت الشمس |
وباهون وسيله عن مساره تحوّل |
اثر الطواري تغمس اصحابها غمس |
ويركب عليهم كل قول يقوّل |
نتايج العشرين ما كملت خمس |
منها حكيم الراي قام يتهوّل |
قلبه من احداث الزمن منحمس حمس |
وكل الهموم بوسط صدره تجوّل |
يعرف رفيع الصوت ومكثر الهمس |
ولا هو على كشف السراير مخوّل |
بعض الحقايق ما توارى مع الطمس |
والبعض الاخر عند الاجواد طوّل |
أحمد بن سعود الحمد |
|
