يكتب بمجهره الشاعري الدقيق ويرسم بطاقته الإبداعية قصيدة لا تمر مرور الكرام. |
على الحر يا كثر العنا والنكد كثراه |
لحا الله زمانٍ فظ ما فيه ماويه |
بعيدٍ عن اللي رفعته من فعل يمناه |
قريبٍ من أرباب الخمال وردى النيه |
مزايا جهاته خالفتها هبوب ارياه |
قبوله دبور وشامه اضحت جنوبيه |
يقوله عريبٍ رافع للولي شكواه |
من سنين والهيه تصيبه ورى الهيه |
إن اشتا تلقى زمهرير يشل اعضاه |
وان انكف لصيفه كود الصيف بالكيه |
الأيام بفلول القصا حدته لاقصاه |
كما حد غيره من هل الغيره الحيه |
دهانا كتام من وحمه العجب شفناه |
غدى التافه اكثم والسفيه ابن جوزيه |
تعلى المنابر بهلوانٍ كشف معناه |
اثر حكمة اشعب في عقول الطفيليه |
خفيفٍ طريفٍ زود نقصه يقود خطاه |
تنادت لتمكينه خطاة الرباديه |
زمان العجاج الظاهر ان العجاج اعماه |
سوى عن مشاهد هملٍ جرب منفيه |
من الجور كلٍ عد نفسه رفيع الجاه |
كلام يطير به الهوى دون ما هيه |
متى يا هليمٍ ضيم جده ومعط شواه |
طرى لك تفاخر والتواريخ مقريه |
لو أن الحيا يندى له الما بوجهك جاه |
شعور الحيا ما هوب راعي قطاعيه |
إلى شفت من حدثته اغضى فهي بلواه |
دعت ضحكته وبمثلك الناس مبليه |
عسى الله يرزقنا شكر نعمته ورضاه |
الاصوات مذكوره والافعال منسيه |
جريح النظر وشلون جرحه يمض دواه |
وهو يا رده محذور نابٍ وشبريه |
يطيب الخنوع اللي تجاهل شرف مبداه |
مهوب العيوف اللي مباديه محميه |
وكاد انه اتعبه العطب واشغله واشقاه |
زمانٍ جذب دلو الذباذب من دليه |
عطا من يوده صابره والتفت لاعداه |
الين استهان بقدر عاليه دونيه |
إبراهيم العبداللطيف |
|
