يا سلامي على زيزوم نجد وأميره

ماص مفراص شيّال الحمول الثقايل

أصدق البأس حلال الأمور العسيره

وأكرم الناس قطعاً من عصور الأوايل

شيخنا اللي لنا بد القبايل ذخيره

والذخيره له أنّا دون كل القبايل

ذاك سلمان منتوب لصقر الجزيره

جاذبه وأنجذب من طيبين الحمايل

السدارى خواله محتمين القصيره

والعمام السعود أهل القنا والسلايل

الذحاح أن غضب وإلى التطم هو نذيره

وأن نوى الطيب يسبق بالكرم والجمايل

حاز كل المكارم باليمين الشطيره

يالفعول القديمه جاك راعي الفعايل

ما تكفّى بفعل مصادمين المغيره

وايلي ويبغي فعل بكرٍ ووايل

لو جدوده خيار ويحتمون الكسيره

فيه نفسٍ طموح وفيه صدق وصمايل

نهر جوده يذكّر واطي كل ديره

زايدٍ نفح طيبه صادقات المخايل

يوم غيره رسوسٍ ما تلفت لغيره

كاسي نجد كله من عفيف لحايل

له بكل القلوب الحب ينفح عبيره

والكلام المؤكد ما يبي له دلايل

وأنت تدري بمكنون الفؤاد وضميره

يا نحاز المعادي يا رفيع النزايل

لو تبينا مشينا ما عقبنا المسيره

مثل ممشى الجدود اللي تحث النحايل

يوم وقت المعارك والحروب الخطيره

مع معزي مشينا بالقنا والفتايل

ربعي سبيع يا معطي العطايا الكبيره

هم حزامك ودرعك حين وقت الوهايل

كم عدو جواده قدم وجهه عقيره

ما نبي منه ثار ولا مجازاً بدايل

مير لأجل الإمام اللي ضفى الناس خيره

رافعين العلم من دون قيل وقايل

ما نشدنا عن ملاقى الوجيه الشريره

دام راس أبو تركي ما توفى الظلايل

يشهد الرب والعربان فينا خبيره

والجموع الكثيره أولتها قلايل

خالد بن فهد أبو نيان

صفحة الجزيرة الرئيسية

الصفحة الرئيسية

رأي الجزيرة