يا ناعم العود عطني وجه واسمعني |
مشتاق أسولف معك واكشف لك أسراري |
في خاطري شي لكن لا تطالعني |
وتقول لي في بداياتي وش الطاري |
إن كان بعتك برخص يالغضي بعني |
وإن كنت أنا الشاري ارحم حالة الشاري |
يا كم على بابك أوقف لك وتلطعني |
وأنا جيت باعاتبك تسلبني أفكاري |
جيتك وكلي أمل لكن تمنعني |
تقول بيدك كذا لا يسمعك جاري |
تحط لي ناس من ربعك تتابعني |
وأكيد هم وصلوا لك آخر أخباري |
فإن كان صدرك خلق الله يا سعني |
ارحم حياتي وخفف كامل أوزاري |
وإن كان غيري هو المقصود والمعني |
فاكشف لي السر يمكن ألتزم داري |
وأقول حبك أبد ما أظن ينفعني |
والحب ما هو لراعي الخدعة اجباري |
واللي خدع ناس غيري ما بيخدعني |
أنا صحيح المسار وتشهد اشعاري |
وابليس ما أطاوعه لو قال طاوعني |
حتى من الخصم يمكن آخذ بثاري |
ويمكن أسامح وأقول الدهر جرعني |
مرارة الحب من يمناي ويساري |
غرمان محمد عزيز العمري |
|
