ثاني الدهمشي شاعر له أسلوبه الخاص.. |
يتدفق شعراً ليرسم صورة (معبّرة) عن إحساسة الغاير في قلبه.. نضع لكم شيئاً من هذا الإحساس هنا.. |
أنا ما جيت لك إلا عشان تعود |
معي.. وإلا قسم بالله ما اتعدّاك |
مكانٍ موحش اللي ما أنت به موجود |
وأنا ماهوب ذنبي (راحتي ويّاك) |
من اللي قال لك يوم الليالي سود |
تجيني والأمل كلّه على محيّاك؟ |
وقرّة عين أماني عمري المفقود |
ما بين اليأس وسنين الغياب هناك |
بعد ما كبّلت قلبي ثلاث قيود |
فراقك, حاجتي لك, كيف أنا بنساك |
قصيدي موطني كان وبليا حدود |
قهرني مدري هو ما جاك وإلا جاك |
ترجيته يقول ان صاحبك مضهود |
وترى ما ضرتك لو سرّته دنياك |
عموماً ما على ضحكة عيوني زود |
مدام اني معاك الحين واتحرّاك |
تجهّز نفسك ولأجلي معاي تعود |
أو اني لأجلك ابجلس ولا اتعدّاك |
لأني مستحيل أجعل أساي يزود |
أنا فاضي أضيّع لحظة بليّاك؟؟ |
لذا (لقياك) كلمة بابها موصود |
لأن (لقياك) تتبع مرحلة (فرقاك) |
ثاني الدهمشي |
|
