وزن القصايد لاستوت للمحاريف |
ابذكره في كلمة مختصرها |
اليا بغيت تعرف ميزانها كيف |
عاين لحنها كيف يركب بحرها |
وترى القصيد بلا معاني سواليف |
ما هوب يعرف بطنها من ظهرها |
وتمر للسامع مثل مزنة الصيف |
كبد الثرى ما يرتوي من مطرها |
والكلمة اللي فالشعر دون توظيف |
حشو من اللي غايته ما قدرها |
وترى البيوت اللي تسر الملاقيف |
شجرة وبي محد جنى من ثمرها |
تبعد من الحكمة وتقرب من الزيف |
وامحق من اللي قالها من نشرها |
ما دام كل معه راي وتصنيف |
نفسي لها حق بوجهة نظرها |
ودر البحر محد يجيبه من السيف |
ومن غاص فالغبات يلقي دررها |
سالم دخيل الحبابي - الخرج |
|
