اكتب خطأ وامسح من الصح كثره

وعطنا النتيجة ربح وإلا خساره

والناس له من كثر الأحداث عبره

ومن لاعتبر غيره يقل اعتباره

وأسمع يقولون إن في كل سطره

تعليمه وشر الفتى من سطاره

وكثر التجارب زود وتفيد خبره

والشر يبدأ من سبايب شراره

واللي ما قدر طيب جيره وعشره

ما فيه خير ولا بدينه غياره

ومن لا رفع ربعه بطيبه وقدره

حظه تردى أو مصيبه ثواره

والحب ينتج مثل نوعه وبذره

شف للنخل يفرق لو أعجب خضاره

واللي ما صاد بحكي أو فيه شذره

لأعطي عطا ما يكنزه وسط داره

واللي يحب بلقمة العيش خشره

هذاك زود الطيب يرفع وقاره

واللي حفر لأخيه بالدرب حفره

قالو يقع فيها ويحمل وزاره

واللي بنماته يعجل بنشره

أبعد عنه الله يبعد دياره

وقيل الفرج مفتاحه بطول صبره

والشور ما يبدى بغير استشاره

والرجل يفرق طول باعه وشبره

واللي كبر ما فاد كسره جباره

واللي ما عنده للمهمات دبره

يترك لغيره ويتحرى العصاره

والحكي زبده غير طوله وقصره

والذوق بالمنطق احسبه شطاره

والشارع يميز جزاله ونبره

والشعر حبك وسبك ما هي هذاره

واللي تردى عقب خوه وسفره

يكفيك مرة لا تعيد المراره

واللي ما كسب العلم مبداة عمره

ما يكسبه لا زاد شيبه غزاره

وكثر الخطأ ما فاد تقديم عذره

المعذره هذا مخالف مساره

وأنا اختصرته هي قصيده وفكره

ولكم التحية صدق باجمل عباره

قناع ناصر الاسعدي

صفحة الجزيرة الرئيسية

الصفحة الرئيسية

رأي الجزيرة