مرحبا أعداد ما هل همال السحاب |
وعد من صلوا لمكة ومن ياتونها |
مرحبا ترحيبةٍ ما لها عد وحساب |
ما تقدر في ثمنها ولا مضمونها |
مرحبا بك في محلك بعد طول الغياب |
قلتها والشعب بقدومك يغنونها |
شوف عيني فرحة العود في وجه الشباب |
وفرحة الطفلة بوجه أمها وعيونها |
رددوا عودتك سالم يا مرفوع الجناب |
لو تقدر بالثمن والله أن يشرونها |
يطلبون الله يعافيك والرب استجاب |
استجاب لطلبة دائم يدعونها |
وحقق الاحلام والحظ في شوفتك طاب |
وغرد القمري والاصوات جر لحونها |
يابو خالد راعي الطيب والرأي الصواب |
يا زبون الطيبة وأنت رافع شونها |
أنت سيف العز والحق يا رمز الكتاب |
وانت أخو قائد بلدنا ودرع أحصونها |
أنت درع المملكة وأنت حلال الصعاب |
والعقيدة تحتميها وتاقف دونها |
وتدفع الغالي وترخصه في عتق الرقاب |
ومدة أيمينك مزونٍ تهل ردونها |
فزعة المحتاج لا صارت أحلامه سراب |
كلمتك يسمع صداها قبل يقرونها |
مرحبا بك في محلك بعد طول الغياب |
قلتها والشعب بقدومك يغنونها |
مهدي بن مسفر الحبابي |
|
