رثاء في أخي محمد بن شقير أبو دحم السقيان رحمه الله.. |
ما تمنع الاقدار لا منها جات |
والأمر للمولى وحنا عبيده |
واللي كتب للوح ما عنه سجات |
الله يزود له أعمال جديده |
يا لله يا خلاق سبع السموات |
يا موجهن عبده على ما يريده |
تجعل مقره بالجنان الظليلات |
في جنة الفردوس يلبس جديده |
مرحوم يا راع الوفا والمروات |
أنا أشهد انه راح منا فقيده |
فقيدةٍ تعرف على طول الأوقات |
لا جنب الماجوب خطو البليده |
مرحوم يا رجل علومه شريفات |
اعداد ما تكتب وتنشر جريده |
مرحوم ياللي لك وصايف عجيبات |
قليل ما توجد أوصافه فريده |
منها الكرم والدين والصدق بالذات |
وحلم على الجاهل وستر البديده |
ترجع لك القالات وان راحت وجات |
وفعال أبو دحم دايم حميده |
فعوله ما تنحصي بالسجلات |
ما تنحصي لو كان نكتب قصيده |
محمد رحل بس الفعل حي ما مات |
فعله يخلد له سنين مديده |
والله لو انه على الكيف ما مات |
والموت خبرنا وأرسل بريده |
أفداه أنا بنفسي على كل حزات |
ويسلم عضيدي سعد من هو عضيده |
الموت حق ولا عن الموت صدات |
ولا أحد على كيفه يفكه رصيده |
وصلاة ربي عدد ما تنسج أبيات |
على نبي وضح دين وعقيده |
فريح بن شقير السقياني |
|
