الناس ليل وحبهم شفّ وارياح |
وما شوف غير النور شي يسدك |
صعبة تحصل ودهم دون مصباح |
يعني بدون اخلاق محد يودك |
خلك وسيع الصدر والبال منساح |
تكسب قلوب وعكس ذلك يلدك |
واحذر تصير اللي بالاسرار بواح |
لا طروا الأنذال كل يعدك |
وترى القدر ما يرتفع صعب لا طاح |
والهرج عن حب الخلايق يصدك |
ياللي تقول إني عن الهرج منزاح |
ليه الحكي بالناس دايم يشدك؟ |
لا تعتدي بالقول وتقول مزاح |
ترى الخطا للذل واللح يحدك |
لسانك الجراح لو كان مداح |
ما يسترك والثوب ما هوب قدك |
لا تستفز الحرف والبال مرتاح |
مخلاب قافي لا يوسم بخدك |
الحلم سجن الغيظ والسب مفتاح |
وانت بكلامك تعتق الشر ضدك |
ولا صار شري نار والهرج قداح |
وانت الورق، لا تشعل النار حدك |
فيصل بن سبيّل الباهلي |
|
