ماجيت لك مشتاق جيتك اخبرك |
كم مرةٍ من واهج الشوق جيتك |
عيني تبي بعدك وقلبي تعذرك |
ابنسحب واللي عطيتك عطيتك |
كم لي وانا اعزك وكم لي مقدرك |
ويا ما نصحتك عن خطاك ونهيتك |
يلي تجاهلني وعيني تناظرك |
يا ما ترجيتك ويا ما رجيتك |
تخطي وتبغاني على ذنبك اشكرك |
لا والله الا بعتك ولا شريتك |
مدام ما قدمت واجب مسيرك |
طويت صفحات الغرام وطويتك |
تدري وش آخر شي ما ودي اخرك |
يا ليتني ماجيت يمك وليتك |
تاخذ دروس من الزمن قبل يجبرك |
على طريق الذل ويهد بيتك |
كتبتها ذكرى على ساس مذكرك |
لا من ذكرت اللي كتبته نسيتك |
الشاعر عطا الله بن رويعي الحربي |
|
