صعبه اعيش ايام عمري بلياك |
وانت الحياة بدون شوفك كآبه |
تعال خذني لاخر حدود دنياك |
مليت اقاسي من زماني عذابه |
حاولت لكن ما تحملت فرقاك |
بُعدك عذاب وفي حضورك مهابه |
للشوق فيني شي لا ما اعتقد جاك |
حوّل حياتي للملل والرتابه |
اوقات اشوف ان الغلا ما تعداك |
واحيان احس ان الهوى للغلابه |
بين المحال وبين خافي نواياك |
حار السؤال ولا لقيت الاجابه |
كانك تقول هموم وقتك تقفاك |
وش حيلة اللي صار همه زهابه |
يطرد سرابك في متاهات رجواك |
نفس الطريق اللي مشيته مشابه |
قلبٍ يحبك كيف يسلى وينساك |
ما للفضاء لو شفت دونك رحابه |
خليتني عايش على حد الادراك |
مثل الجريح اللي تمادى صوابه |
ماحدٍ ملا عيني من الناس لولاك |
في غيبتك كل الاوادم تشابه |
هذا الشعور اللي من اقصاي ينخاك |
يبي القليل وما عطيته رضابه |
كل القصايد داخلي همها ارضاك |
حبك مدادي لا بغيت الكتابه |
اجيك كلي يوم كلي فداياك |
كلش يهون الا الحبيب وغيابه |
رد الوفاء والحب للي تمناك |
قفى العمر واحلى ليالي شبابه |
جتك المشاعر ما لها غير شرواك |
دامك ملكت الروح وين الغرابه |
العفيف - البكيرية |
|
