رثاء في الشاب بدر بن عمير الحقباني رحمه الله وأسكنه فسيح جناته |
العلم جاني يا مرسول العنا وش لك |
وش لك بحالي عدمت الحال في الحالي |
ويا دمعة العين مهلك بي على مهلك |
ويا قاف حزني بتسمع جر موّالي |
الموت جاري على بعدك ومن قبلك |
علمٍ وكادٍ وكل الناس زوّالي |
فعلاً فقيدة علينا يا بدر كلّك |
شرواك نادر ويا قلّك في الأجيالي |
سمّوك بدرٍ وفعلاً بان من فعلك |
بدر تجلى همامٍ ذرب الأفعالي |
الطيب طبعك وطبع الطيب يحسب لك |
وإن جا مجاله بتضرب فيك الأمثالي |
وإن جيت لخلاقك العليا فلا مثلك |
نفسك عزيزة تعاف القيل والقالي |
موتك فجيعة فجع قاصي ويقرب لك |
وعليك هلوا غزير الدمع همّالي |
توك شبابٍ عسى المولى يعوّض لك |
ما راح من عمرك الغالي لك بغالي |
حوريّةٍ من بنات الحور تضحك لك |
وفي جنة الخلد لك مسكن ومنزالي |
ويالله عسى قبرك المنزول يبرد لك |
وتنبت عليه الورود ألوان واشكالي |
ويابو بدر ما جرى شيٍّ مقدّر لك |
أمرٍ مقدّر ومكتوبٍ من الوالي |
اصبر وصابر عسى السلوان يكتب لك |
في صفحتك في نهارٍ كله اهوالي |
فيصل بن محمد بن سيف |
|
