سفينتي في بحر الأوهام عايمه |
ونفسي عن المشروب والزاد صايمه |
أنشد نجوم الليل لي لاح نورها |
وأسأل طيور في سماء اليأس حايمه |
وأخفيّ العبرات فيني وأكنها |
في نفسي اللي صارت اليوم هايمه |
سبة عزوف اللي تمناه خافقي |
وطاع الوشاة وذقت قسوة ظلايمه |
وحبال الأمل من شد كفي تقطعت |
وصارت سحابة حزني اليوم غايمه |
هذي حياة الحب يا جاهلا بها |
سهير عين.. وعين الآنام نايمه |
لاشرب.. لا مأكل.. ولا نوم ذاقته |
نفسي عن المشروب والزاد شايمه |
وليمن نشدت العين هلت وجاوبت |
ذاك الأمل ما باقي إلا حطايمه |
وعزاي دمع حرق اليوم وجنتي |
دمع على الخدين بانت وسايمه |
وسلواي ريحه لي لفتني مع الهوى |
وهبوب حيه لي لفتني نسايمه |
ويا لله يا لمعبود يا سامع الدعاء |
يا من تشوف العين قدرة عظايمه |
تلطف بقلب بعد سلواه لوعه |
لام الزمان ووقته اليوم لايمه |
سعد الشليل |
|
