خلاص نقطعها من اليوم مابيك |
لا كيف حالك أنت.. لا كيف حالي |
لا لا تحرى حروتي في حراويك |
يكفي خسرت رضاي ورضاي غالي |
الله يبعد عن دروبي خطاويك |
والله يغني عن جوابك سؤالي |
من يحتمل جورك وسطوة مباديك |
حتى الشمالي، ضاق صدر الشمالي |
كم ليلةٍ قفّى قمرها وأنا ارجيك |
واسأل شروق الشمس عن ما جرالي |
طولت بالي بس مليت أداريك |
مليت من صدك لو طال بالي |
ما عاد يسرح بي عن الناس طاريك |
هذا لو انه من فراغي طرالي |
أنهيت تالي الشوق يا شوق بيديك |
وأنهيت تالي صورتك في خيالي |
مدري توالي الشوق مدري تواليك |
بس الأكيد انك نهيت التوالي |
مشاري العنزي |
|
