يا الله ياللي تعلم الجهر والغيب |
يا جاعل مع كل ضيق انفراجه |
يا غافر الزله وياساتر العيب |
ياواحد ماله مع الناس حاجه |
لكن كل الناس عنده مطاليب |
وكل واحد يدعيك تقضي احتياجه |
تفرج هموم اللي غزا راسه الشيب |
وظروف وقته مثل (عنق الزجاجه) |
يارب مالي عن معونتك تجنيب |
لا صار في بعض الدروب انعواجه |
سدد خطاي واهدني دربٍ مصيب |
دربٍ بعد ممشاه نلقى نتاجه |
وانك تثبتني على منهج الطيب |
وحسن النبا وقت اللقا والمواجه |
وتعذني من هقوةٍ يمكن تخيب |
وتعيذني كثر الحكي والسماجه |
ماللرجل في دنيته من مكاسب |
يا كود علمٍ طيبٍ به يواجه |
عند الرجال اللي تعرف المواجيب |
والطيب منهاجٍ وسيعة فجاجه |
وكلن بهالدنيا مضى له تجاريب |
والمستفيد اللي يدوّر خراجه |
هذي هي الدنيا صدوف ومتاعيب |
ويا سعد منهو طاعة الله سراجه |
عطا الله بن ممدوح المضياني - الخرج |
|
