لو يغار الورد بالأغصان من حمر الشفايف

أو تغار أحلامنا من واقعٍ فيه أوقعتنا

ولو تعود آمالنا من واحة الغربة نكايف

تصطدم في صمت باسوار الظروف اللي دهتنا

ما لقينا فالحياة ابراج يا زين الوصايف

تهدي البسمة لنا من بعد ما اغتالت بختنا

عاتيات الوقت تطوي حبنا طي الصحايف

يا كثر ما قد خذت منا ولا ادري وش عطتنا؟

غير لوعة ماضي باقي من أيام عجايف

كل ما لاحت بروق الفكر صوبه ذكّرتنا

ذكّرتنا بالبدايه قبل ما نصبح طوايف

رغم أنّا ما نسيناها وهيه ما نستنا

ونعمة الحرمان تاخذ من وطن حظي مصايف

وقبل ما نعلن ولايتها تجرّت واحكمتنا

بعد هذا ما لنا إلا نومن بحلم الوظايف

والحياة إن ما رضينا بامرها ما شاورتنا

وممكن الدنيا تفرِّقنا بعد كنا ولايف

وممكن الدنيا تجمّعنا مثل ما فرقتنا

القضا والقدر يرسم في حواجبنا طرايف

وكان ما انحلت قضيتنا بتكبر مشكلتنا

وهكذا الأيام ترعب فارس ما كان خايف

كم عزيز بهذلت حاله مثل ما بهذلتنا

وإن رجعنا للحقيقة ما على الدنيا حسايف

كلها أيام وليالي ثم تطوى سالفتنا

مسفر الصفا

صفحة الجزيرة الرئيسية

الصفحة الرئيسية

رأي الجزيرة