ألا باسم الله الهادي بديت ومرحباً ترحيب |
هلا يا مرحبا واهلا هلا مليار ترحيبه |
هلا باللي طلبنا الله وندعي له بظهر الغيب |
وفضله بعد فضل الله نصبح به ونمسي به |
هلا باللي كسب شعبه بحب وغاية الترغيب |
وملك حب الشعوب وخصلتين الطيب والهيبه |
هلا باللي نبات الروض حسب غيبته تحسيب |
وحمام الورق هلا به هلا يامطول الغيبه |
هلا يالفيصلي اللي قدومه مثل نفح الطيب |
يابو متعب ظلال الشعب ساس الجود والطيبه |
خيالك ما يفارقنا وشلنا صورتك في الجيب |
محبة يالزعيم اللي مع العالم نماري به |
مواقيفك تنومسنا قديمة ماتبي تجريب |
معك فزعة وبك نخوة وعز الدين تمشي به |
نجدد لك ولانا اللي ورثنا دون شك وريب |
عهد فوق الرقاب ونظهره لي جت مواجيبه |
مواجيب على الفطرة ورثناها شباب وشيب |
يترجمها جميع الشعب حب في معازيبه |
محبة حب مازحزح ولانا شلة التأليب |
ولانسمع عدو للوطن يسعى بتخريبه |
بعد هذا ابي منك السموحة ماب عذري عيب |
عجزت القى كلام عن شعور القلب وابدي به |
أقلبها يسار يمين ويش اترك ويش اجيب |
بذلت الجهد والمجهود وانت وصوفك صعيبه |
كلام المختصر والزبدة اللي مالها تكذيب |
طبعته حبكم فوق القلوب ولابها ريبه |
عبد الكريم بن سعد بن الشمالي |
|
