منت مكتوف.. وربيب.. وزهملوك وثاوي |
وماش في ساقك سبوق.. وبعد عظمك عردا |
اشهرك وافرد مساحات الهدد وتلاوي |
من سموم القيط والا من شديد الصردا |
دام مخلابك احد من الشطير وطاوي |
طوّف المكسوره وحول وخم الشردا |
ما كرك روس الطوال.. وللبعيدة طاوي |
مبتعد عن حروة الهين وروس العردا |
من وقف لين هبوب النود ماهي تاوي |
تاتلحه لين يبقى عود مبري جردا |
كل ما اذكر من (يمثل) دور ذيب عاوي |
الملامح لك علاها.. والجماهي دردا |
وكل ما أذكر من تنصل من عروقه غاوي |
انقباض القلب يطرد فنبساطه طردا |
ومن سرح غبشه وهو ظامي وظامي ضاوي |
ماش له فالبير لا مشرب ولا له وردا |
وانت ياللي مزهر بعقلي ولا انته |
ذاوي ترتويني عمر واعيشك سلام وبردا |
تاتجول في عروقي لين قلبي تاوي |
وارقد امن في ربوعه دام ساكن فردا |
وكل ما جيتك حبيبي ما لقيتك خاوي |
الشعر كفٍ ندية والمشاعر وردا |
|
