شاعرين بالمعاني والجزايل شوقونا

واشرحوا حال القصيد اللي شكى جور الزماني

نشطونا وامتعونا وافرحونا واسعدونا

وانشروا قول موثق بالدلايل والبياني

خالد بن سعود دكتور المعاني واللحونا

لابدع شرد البيوت يصير معنى الشعر ثاني

يا سلام الله عليه الشهم جلاي الحزونا

عد نفحات الخزامى والنفل والقحوياني

ويا سعد ياللي نظمت القاف والله ما تهونا

يا بن ربع يكرمون الناس جيران وعواني

وضعنا حساس بالله ياهل العرف اسعفونا

يا وسيعين المدارك يا طويلين اليماني

شعرنا عود ضحية واصبح إسفاف ومجونا

ضاع قدره واصبح بدنياه مثل العود فاني

سبت اللي دوخونا وازعجونا واشغلونا

كن واحدهم مهرج مسرحية بهلواني

ادبلوا كبد القوافي واسمجوها واسمجونا

وقلبوا طرق اللحون السامريه ليل داني

ليت به قاضي مفوَّض وسط ساحتنا يمونا

واحد حكمه صريح امضى من اشبات السناني

له حصانة دبلوماسي وان عطى حكم يكونا

نابغة في وقتنا الحاضر وله قدر وضماني

ينتقي واحد من الخمسين والباقي بدونا

ويبعد أصحاب المهايط والمصايح والجناني

ويالله المعبود ياللي أمرك بكاف ونونا

جاعل الدنيا اختبار للبنادم وامتحاني

ما يجينا ريب في ذاتك ولا شك وظنونا

مؤمنين في صفاتك يالكريم المستعاني

يالله انك تحفظ أمن المملكة بأمرك تصونا

ديرة بالشرع قامت هديها السبع المثاني

باني بن عبد الله البقمي

صفحة الجزيرة الرئيسية

الصفحة الرئيسية

رأي الجزيرة