سلام من الصفا للي معي قلبه صفا بالحيل
صفا لي بالغلا والحب والتقدير والشيمة
سلام صافي اصفى من شراب العذب بعد السيل
من النّو الحقوق اللي بروقه في مقاديمه
ازفه من صميم القلب انا واجمله تجميل
لمن في ماقفه جمّل وكمّل واحتمى زيمه
صفا لي ماتسمع في كلام الزيف والتضليل
ولاعدّل ولا بدّل ولا غيّر مفاهيمه
وانا قلبي صفا له والله اني مااقبل التبديل
وطول العمر يبقى في فوادي غالي القيمه
انا اداريه واحبه ودوم ادلله تدليل
واعز ايام عمري في حياتي يوم تكريمه
غلاه الله عليّه قدره في محكم التنزيل
محبه روس من شيمة نفوس ولابها غيمه
سكن بالقلب مابين الضلوع ولانوى الترحيل
لزم في معاليق الفواد الفين تلزيمه
على كل اصدقايه فضّله رب العلا تفضيل
عسى الله يحفظه من كل باس وشر ويديمه
عروفٍ في مواقيف الشرف بالمعرفة حلحيل
حكم بيت القصيد وجاد في حبكه وتنظيمه
رفيق مايتخلى عن رفيقه بين يوم وليل
ابد ماشفت انا شرواه في عزمه وتصميمه
مثيل العيدهي يصبر على حمل الشقا ويشيل
ليامنه ركا للحمل شاله ماشكا ظليمه
لكنه لو عرف وش صار بالتحديد والتفصيل
ماظنيته يغير منهج ثبت مراسيمه
واظن الوضع مايحتاج كثر الشرح والتحليل
ولاينفعك يابن اعميش تاخيره وتقديمه
لكن بعطيك علم خالي من الكذب والتهويل
ليا انهد الجدار اللي مشيد صعب ترميمه
نوينا نبني ابيوت الاماني فوق نجم سهيل
لكن هبت ارياح الخريف وطاحت الخيمة
ولو إنا نفتش للخطايا صدق بالدربيل
لقينا كل عود فيه حنوه صعب تقويمه
ولولا حزة الفزعات وش نبغى بربط الخيل
ولولا ذمة الرجال مانرضى بتحكيمه
ولو ان الشواوي يسمع اهل القول واهل القيل
يجيه الليل بالمضما ولا ورد مجاهيمه
واختام العلم ياراع الوفا والصدق والتبجيل
عليك اثني من اعماق الخفوق الفين تسليمه
