يا درع الدار يا والي عهدنا الوافي المامون
عليك العون ياللي منك خلقك تستمد العون
عسانا ما نعيش ولا نموت إلا على دينك
رجانا فيك ياللي ناصرٍ موسى على فرعون
ما دام ارزاقنا وآجالنا والعفو بيدينك
عساني لا وقفت الحشر لا داين ولا مديون
وعسا رحمتك تشلمني ليا نصبت موازينك
وعقب ذكرك يا رزاق العباد وناصر المغبون
تولم يا قصيدٍ لأطيب الأوقات حاسينك
عليك اللوم يا شعٍر تجي وقت اللوازم دون
ترا كثرت مشاريهي على كثرة محبينك
ما خاويتك ياشعري غير حشمة خاطرٍ مشحون
اليا دكت شياطينه إتعانقها شياطينك
وابيك اليا حضر ولي عهد وحاكمٍ دندون
ابيك تعانقه بزهور فلٍ من بساتينك
سلام الله سلام للنوايا الصادقه عربون
يقبل منكبك ياسيدي ويقبل يمينك
يا درع الدار يا والي عهدنا الوافي المامون
عسى ربي يبارك فيك ويعافيك ويعينك
اليا منه سلم راسك ترا كل الامور تهون
ومن إدعانا بشهر الخير ماحنا بناسينك
لو ان العمر يعطى والعرب لاعمارهم يعطون
تقاسمت العمر ياسيدي ما بيني وبينك
ولكن العَمار وعِلمها بيدين رب الكون
ولكنا نقول الله يمتّع باقي سنينك
على الشعب السعودي غيث مزنٍ من وراه مزون
وحنا معك بالارقاب والاعمار فادينك
نجاهر بالغلا وانتم ياحكام السعد تدرون
عقب رجوا عزيز الجاه ياسلمان راجينك
نعيش بخير في دارٍ علينا خيرها مضمون
راعاك الله يادارٍ لنا تصدح مواذينك
مقامك يا وطنا فوق فوق ولا يعّود دون
تريّح لا تشيل الهم من كثرت إمعادينك
لو ان شعوب الارض تخون حنا مستحيل نخون
سلاطينك هل العوجا وحنا مع سلاطينك
لهم بأرقابنا بيعه وحنا بالولاء ماضون
نهين اللي يفكر بس يطمع فيك ويهينك
تنفسنا غلاك وصرت معنا بالغلا مرهون
مثل مانوالي اصغرنا غلا حنا إموالينك
حميناك ودحمنا عنك بمتون تدك متون
وجابهنا العدا دونك وصفينا ميادينك
بوقت فات يوم اسلاحنا الشلفا مع القبسون
وحنا مع معزي حامين حدك وحامينك
ما دام إنا وفينا معك بسنين القشر والهون
ترانا عند خبرك عقب ما كثرت ملايينك
عساكم يا حمات ارض الوطن لأرض الوطن تبقون
وذي ياسيدي كلمات واحد من محبينك
وهلا ياسيدي مليون في مليون في مليون
وعلينا ياخوياك اليوم ماحنا موصينك
مهنا بن صالح العتيبي
