يا طويق يا العارض يا وادي حنيفة

«من طوّل الغيبات جاب الغنايم»

جاء من سنينه كل أبوها مريفة

جاء من علومه كل أبوها عظايم

سلمان نتعب ما لقينا وصيفه

مروي ظما الحلم بقراح العزايم

ما له عن اللي قد نوى به نكيفه

وما به على اللي قد لجى به هضايم

ياقف لرد الحق ويسل سيفه

في طاعة الله ما خشى لوم لايم

يجود من خيره لربعه وضيفه

ويعطي معادينه حسوف وندايم

وقفة لواء جبهة، وجلسة خليفه

لله درّه؛ شيخ.. قاعد وقايم

تقول: مخلوقٍ على كيف كيفه

استغفر الله.. لكن الشعر هايم

وشلون أجل نفسه كبيرة خفيفه؟!

ما له شبيه إلا هبوب النسايم

تسري له كبار الأمور الكليفه

وتسرح وطير الخير فالجو حايم

ما همّه أحكام العقول الضعيفه

من خلقته دايم عن الشين شايم

متعالي وروحه عفيفة شريفه

عسى فداه أهل الحسد والنمايم

يآخذ وثيق العلم ويكب زيفه

ما يحتري بايع وشاري وسايم

وإن غاب حتى لوه ما غاب طيفه

ما طوّل الغيبة وجاب الغنايم!!

فيصل الشريف