الله يخليك ماني ناقصٍ ضيقه
فيني من الضيق ما يملا لي أوراقي
اثري اليا جبت صوتي في طواريقه
اجر قلبي وأنا مدري عن الباقي
الصوت حزنه كواني مابلع ريقه
والدمع موجود لو مافاضت أحداقي
تكسر الوجد مير الشوق تحليقه
كاشف نحر نادرٍ طلاع لحاقي
طلعه بعيدٍ وعوقه من مسابيقه
يكفخ وكنّه يقول السبق ما لاقي
اون والقلب تومي به معاليقه
اوماية الغصن لامن حت الاوراقي
مليت ليل الحنين وصب أباريقه
يالذة الجرح مامليتي إغراقي؟؟
من كثر ماقول ياصبري على الضيقة
تكشف الجرح ياصبري على الباقي
الشاعر/بدر العرافة
