يقول من ثوبه وصدره ضاق به

لاهيب لازانت ولا عيت تزين

كل ما قعد له في مكان وراق به

هبت على قلبه هبوب الغايبين

ليت الجروح اللي تجي متعاقبه

تحط بين الجرح ذا والجرح حين

كلٍ وله قلبٍ وعاش وذاق به

يا رب أنا إنسان من ماءٍ مهين

عبدٍ وأخاف الله ودوم أراقبه

عندي شعور وحس وآمال وحنين

يا رب أنا طالبك حسن العاقبه

يا رب صف الآيبين التائبين

لو مالنا بالوقت نظره ثاقبه

يا معشر العشاق حنا صابرين

يا قلبي إصبر والصبر عواقبه

تبين بس إصبر يجي يوم وتبين

قام الغثا ينساق بي وانساق به

أمشي وأقول الله يا قلبي يعين

يارب لي قلبٍ صغير أشتاق به

زادت عليه الكيل صكات السنين

أسرف بحب اللي يحب وحاق به

طول السهر والضيق وأمسى بين بين

واللي زعل بس الزعل مالاق به

قلت وفعلت ومت أنا عيا يلين

قلبه ووقفاته معي مناقبه

ذرابته ضحكه ودمعه والأنين

لو هو فتح قلبي وشاف وواق به

والله ورب البيت ما يمسي حزين