والله.. لو لا.. خطوةٍ عندي بعيد
وأسبابٍ بصدري.. تعجل مراحي
لأجي.. محل الخل وأعيد العيد
وأحاول أنسى الهم.. وأطلق سراحي
لكنه البارح.. عسر قلبي القيد
وكفخ.. وطارت ريشةٍ من جناحي
وإن شالها الغربي معا واسع البيد
وجاتك مع الغبشة.. بوقت الصباحي
فلا تذرف الدمعه.. فدو عينك الغيد
اللي تسيل أدموعهن.. من قراحي
وقفيت لكني.. أراعي مع السيد
نجمة سهيل اللي تزيد أنشراحي
وسريت.. أكن السر.. ياساتر الجيد
ولو صدني بوحي.. بأروح إمتناحي
مع صحصح ٍ خالي وأنا ماني أسعيد
مع صكة الصفرة.. ولا الشوف باحي
لكنها أقداري.. وأنا أريد وتريد
والله يفعل مايشاء.. في جراحي
يزن الروقي
