من سنة وشهور مهموم ما راق المزاج

ومن نشدني قال وشفيك ضايق؟ قلت خير

الهموم لها على القلب ويقة وادلاج

كل ساعة لازم الهم وسطه يستدير

ولا بغيت اضحك مع الناس وافل الحجاج

ولعت سود الهواجيس في قلبي سعير

وكلما لديت بالعين ضاقن الفجاج

لا ذكرت مفارق اللي مفارقهم عسير

ولا ذكرت احلامي اللي يضيق بها الزراج

يوم كانت تظهر الصعب في عيني صغير

كنت احسب الدرب ممشوق ما فيه اعوجاج

واثر حلمي غير واللي كتب باللوح غير

كسرتها سود الايام تكسير الزجاج

وغافلتني وطعنتني على الضلع القصير

ومن سبب جور الليالي تجرعت الهماج

واحدثت جرح على من تفكر به كبير

ان شكيته عذبوه الدكاتر بالعلاج

وان تركته صار سم على روحي خطير

ما لي الا منزل الغيث من عقب العجاج

مومن بالله واخشى عذابه واستجير

اطلبه في كل الاحوال وارجيه الخراج

مخرج الغرقان من غبة البحر الغزير