اول حزن شفته بحجر اليمامة
اخذ يحلِّفني عن اخبار سلمان
متى يعوِّد للوطن بالسلامة
ملامح العارض حزينه وزعلان
وقّفت لحظه ضاعت الابتسامة
رد السؤال وقال ماعندك لسان
قلت البقى فيكم بقلبي شهامه
ماودي انقلِّك خبر فقد سلطان
وهلت مدامع ماعليها ملامه
دمعه لغالي دارها كل وجدان
أسمع حنينه يعتزي كل قامه
ثم اعتزى يانجد فارقت خلان
ياطويق والله راح عالي مقامه
واحزان قلبي قطّعت كل شريان
حصن الرياض ورافعٍ كل هامه
اللي بنى للمجد والعز بنيان
مشيت من عنده برمز وعلامه
ماكنّه الا انسان يبكي له انسان
وصَّاني انقل بالتعازي كلامه
امانته سلِّم على راس سلمان
الشاعر - عبدالله بن سعود العنزي
