يعيش الوطن لاهل الوطن شامخ ومحشوم

يحبّونه عياله ويحمونه رجاله

ويذودون عنه الباغي الحاقد المهزوم

ويصكّون بيبان الوطـن عنه واشكاله

مادام الولا لاهل الولا ماضي ومحسوم

يموت الحسود بغبنه وزود غرباله

ومادام ان ابو متعب ابونا عقيد القوم

فقولوا لوطنا اليوم لا ينشغل باله

زعيم العرب درع العرب رمحها المسموم

هلاك الهبيل اللي ركب صهوة هباله

ترانا سعوديين يوم العزوم عزوم

ونبقى سعودين والطيب نسعى له

نصون الوعَد والعهْد يوم السلوم سلوم

وعدو الوطن لا رحم عمه ولا خاله

وطنا وطن جداننا وبيتنا المطموم

وهو ظلنا اللي عمّنا بارد ظلاله

نحبّه وحبّه في الصدر طابع وموشوم

وحنا إلى من قَصْرَت حباله حباله

نحبه محبة عمر ماهي محبة يوم

ونفديه رجليّه ونفديه خيّاله

ولا والله نحسّب لقا فرس ولاّ روم

وإلى صاح صيّاح الوغى يبشر بفاله

وعز الله ان اللي انحرم منْه اهو المحروم

ياعزي له ووجدي عليه وعلى حاله

ولعيون ابو متعب يطير الكرى والنوم

ونصفّ ونحيّي سيدي وناقف قباله

وإلى من دعا الداعي يفز الوطن ويقوم

ويفزّ السعودي ما بعد شرْب فنجاله

في عهده عسى الله يحفظه ما انظلم مظلوم

ولا ضاع حق ولا انغبن مسلم بماله

عيونه على الشعب السعودي تخيله دوم

وحب الوطن واهل الوطن ضمّه وشاله

كم اصدر طويل العمر من أمر ومرسوم

وعاش الوطن في خيره وعاشوا عياله

شبع من فضايله الغني ومثله المعدوم

وكل الوطن في حضرته زانت احواله

وصار المواطن وين مايتجه مخدوم

وكل ٍ على خير الوطن نوّخ جماله

عسى الله يطوّل عمر ابومتعب الزيزوم

وعسى الله يجـازيه المثـوبة على افعاله

وعسى روضة خريم وسماها مطر وغيوم

وعسى ارض ٍ نزلها تسعده وتّهيا له

وعسى الله يظله لا اجتمع حاكم ومحكوم

في يوم ٍ يحاسب كل حي ٍ على اعماله

ونموت ووطنا شامخ ونايف ومحشوم

يحبّونه عياله ويفدونه رجاله

محمد بن راشد بن محمد آل حبشان