أصبح الصبح وأصوات العصافير

تلهج بذكر خلاّق البريه

له تسبح وتخضع له بتقدير

وتلتمس منه غفران الخطيّه

مر ليل وبدأ يوم وعسى خير

ومثل ما قالوا الخيره خفيه

نطوي العمر في دنيا المشاوير

في ثرى أحلامنا روحه وجيّه

ما مضى راح يشبه للأساطير

وما بقى غيب والنيّه مطيّه

للمنايا تسيِّرنا المقادير

وآخر العمر تنهيه المنيّه

الليالي بها حيل ومعاشير

وان ضحك وقت لا تأمن قفيّه

طاعة الله ومعرفة المناعير

هي ثمر زرع دنيانا الدنيّه

وما سواهن معرض للمخاسير

لو نزل في سنام العالميّه

نجتمع دوم في حب الدنانير

ونفترق دون ذنب ولا قضيّه

بالخطا نعرف دروب المعاذير

نطبخ العذر طبخ الشاذليّه

ما نراعي مقامات ومحاذير

ولا نغادر حدود العنصريّه

وان نصحنا زعلنا خير ياطير

ونتهم من نصحنا بالحميّه

اختلافاتنا في صبح وعصير

أكثر الناس ما قدّر خويّه

الصداقه تهون بدون تبرير

تولد الصبح وتموت العشيّه

ما تشاءمت والدنيا بها خير

التفاؤل سمة خير البريّه

المطر يسبقه عج ومعاصير

لكن اليا نهمر بالجر هديّه

انبت زهور وورود ونواوير

وصارت الأرض تحفة عسجديّه

الشاعر: عبدالعزيز الشهيل