جميل اسافر بذاتي على ابياتي وانا الملّاح
وابحر في عيون الزين رغم مالموج يرميني
أنا شاعر كوان الضيم والبس من عناي وشاح
واهيم بداخل حروفي اواسيها تواسيني
أترجم للغلا عشق ٍ سكن فيني ولا ينزاح
رغم ما شفت بالدنيا هموم ٍ تزحم سنيني
رغم ما احاول اتجاهل هموم ٍ ساطية تجتاح
حنايا صدري الضايق تقول ارجوك كافيني
أحبّك والهوى بلسم عشقتك والوله ذبّاح
بلاي اعوام يا عمري حنانك ساكن ٍ فيني
كثير يزورك الهاجس وحظي للهوى ما طاح
أجل وشلون في شوفك اكيد السعد يدنيني
هلا يا نصفي الثاني هلا يا عمري اللي راح
هلا يا ملهمة قافي بيوت ٍ دوم تبكيني
تخيّلتك زهر نرجس وريحه بالفضاء فوّاح
أشمك تنتعش روحي رغم مالحظ جافيني
أسولف للقمر عنّك يجاوب نجمه الوضّاح
وعلو سهيل ترجم لي يا كيف البعد كاويني
حبيبي ليه هالدنيا بدونك ما بها افراح
صدودك دوم يسهرني يطير النوم عن عيني
كثير يدور في بالي اقول الزين علامه راح
تمنيته تمناني واحسّه دوم يدعيني
تمر ايام من غبتي وقلبي ما هو بمرتاح
تسلي نفسي الذكرى واحسّك ماسك ايديني
الشاعر - عبد الكريم إبراهيم بن خزيّم
