لا مات شيخٍ يعتلي هامة الطيب

ليثٍ على صكات الايام مقدام

تبكيه عينٍ ما دعتها المناديب

غصبٍ تهل الدمع ما هيب تنلام

والا العمر يمشي سوات المراكيب

دنياك هذى كنها اضغاث الاحلام

لا حلت الاقدار تاتيك وتصيب

عمر الفتا لو طال لا شك ما دام

ذي سنه الله والعمر فيه تغريب

والموت يخضعله ملوكٍ وحكام

علمٍ لفاني يشعب القلب تشعيب

كني مريضٍ جاه ضيقات واسقام

قالوا توفى اللي يعز الاصاحيب

فرز الوغى ليثٍ على الضد ضرغام

أبو فهد له داخل القلب توجيب

راعي الكرام والطيب من روس الاعلام

لا جيت يمه قابلك بالتراحيب

يفرح بضيفانه عزيزين وحشام

حرٍ مقامه فوق روس المراقيب

لا من نخيته يسعد القلب لا قام

من لابتةٍ لا كلب الوقت تكليب

تصمد على مر الليالي والايام

مرحوم يا سويد رفيع المناسيب

له في ثنايا المجد طولات ووسام

راعي الحميه يبذل النفس والجيب

لا شك ياقف للمهمات بحزام

ابشر بعزك ما يرد المطاليب

لا من نصيته وانت ضايق ومنضام

له هيبةٍ ما زعزعتها المناشيب

يحلها لو هي صعيبات وجسام

رأيه سدادٍ يعي الحق ويصيب

لا قال يفعل وافي العلم جزّام

يالله يللي تعلم السر والغيب

يا منقذ خلقك بضيقات وزحام

تجعل مقامه في رياضٍ معاشيب

يا واحد بيديه دورات الاعوام

الله يفكه من سموم اللواهيب

عساه بالجنة له قصور وخيام

والخاتمة صلوا عداد المكاتيب

على نبي شع نوره بالاسلام

صفحة الجزيرة الرئيسية

الصفحة الرئيسية

رأي الجزيرة