بدينا بحمد اللي جزال وهايبه هوالخالق الرازق مسير سحايبه هو المعطي المانع هو الرازق الذي يحيى هشيم بالوطى من شعايبه الهي ومعبودي وربي وخالقي مكون جميع الخلق محسن عجايبه هو القادر اللي ياهب الملك من يشاء وليا عطا ملك فهي من وهايبه بعدها نبي نشرح ونوجز لقصة قصة غرامٍ بين بنت وخطايبه بنت تبي الشجعان والعز والرخا وشروطها صعبه والكل هايبه محدٍ تهقوى يخطب البنت مره وكل عرف شرط الهنوف وصعايبه برز لها مغوار من اولاد مقرن غلام صغير تو ما خط شاربه عبدالعزيز الفيصلي فرز بالوغى متجند شلفاه والسيف قاضبه سرى من صفاة كويت جابر مع السحر نبب على جنده وولم ركايبه ودعهم الشيخ الجليل بن فيصل ودعا إلهاً مايخيب لطالبه وركبوا على عيرات من الهجن ضمر يشدن قطاة تالي الليل هاربه مافوقها الا الكور والسيف والقنا والدرع والقربة وباقي مزاهبه مع وادي العجمان شقوا طريقهم ووردوا على عدٍ عذي مشاربه رووا ونووا وارتووا ثم صدروا وحطوا سهيل من يساره مجانبه تنحروا دارٍ تحرى لجيته دار خذوها قوم للحق غاصبه بالخامس من شوال وصلت ركابهم الى وادي فيه النخيل متعاقبه ستين شغموم على الكور جلس يقودهم ليث نمور صحايبه عشرين مع عشرين صالوا على العدوا وعشرين منهم للركايب جنايبه بعد وصلوا القصر المسمى مصمك يبون راس الداب وقلعة نوايبه على طلوع الشمس شافوا عدوهم عند الجياد الصفر جنده تحاط به قاموا عليه قومة تعجب النظر وخلوا امير القوم تطرخ جنايبه وصاح الصياح بعالي الصوت كله الحكم عود ياجماعة لصاحبه وتباشروا كل الرياض وطوارفه وبعودته كل يهني حبايبه وعم الفرح في نجد واستبشروا به وكل ركب يم الامام بجلايبه يهدون خيل كنها الريم بالفلا ويهدون جيش بالاراسن يقادبه على طاعة الرحمن وطاعة نبيهم وطاعة امام للمسلمين واجبه توحدت عربان في نجد كلها وفي طاعة الامام تمشي كتايبه رفع راية الاسلام وسط الجزيرة وعم الامن في وسطها مع جوانبه عمرها ووحدها وحدد حدودها وطور بلاد عقب كانت خرايبه خمسين واربع حكم صقر الجزيرة الله يجيره من جحيم ولهايبه ويجزاه عن شهب جنات خضرا ويجعل مقامه بين صفوة حبايبه وحكم سعود الخير عشر من الدهر ومشى على نهج المليك وتجاربه وحكم فيصل آل سعود عشر من الحجج ووحد بلاد الشرق هو والمغاربه على التضامن جمع الناس كلهم خلا العجم والسود مثل القرايبه وقف موقف الابطال في حرب سيناء ودعم موقف العربان وقت الحرايبه كل ا لعرب تفخر بفيصل وتنتخي ويفخر به الاسلام والطيب فاه به وحكم خالد آل سعود سبع من الرخا وارخى على الشعب السعودي اطايبه عسى الله يبيحه كل مالاح بارق ويرعد على قبره ويسقي نصايبه وحكم خادم البيتين فخرنا وعزنا رفع سمعة الاسلام فوق الكواكبه جدد اعمار البيت ومسجد نبينا وبنى مساجد للمسلمين قاطبه ووسع مشاريع الرخا في بلادنا وبنى لنا بيت طوال طنايبه نلوذبه عن قارس البرد والظماء هو ظلنا وان جت سمايم هبايبه فهد درعنا اللي بالقسا نلتجي به هو مزبن اللي قاصرات نجايبه هو مزبن الخايف ليا جاه زابن عن الدار واهل الدار يتعب محاربه زبَّن جموع جت مع الصبح هاربه ورد الكويت اللي خدته الزلايبه واصدر قرارات رفع راس شعبه وارسل على العدوان سو العقايبه ياجعل فهد اليوم يدوم عزه وعسى إله العرش يحقق مطالبه وياجعل يفدونه بعض قادة العرب اللي خذوا مال المواطن نهايبه تفخر به اجيال بعد جيل قادم ويفخر به اللي تو مولود جات به سطر له التاريخ مجد من العلا ويستاهل العليا والنعم كاسبه وعبدالله اللي جعل ربي يديمه ولي عهد الفهد حامي جوانبه هو مكرم العاني وهو مخمد الفتن وهو الكريم اللي حميده مذاهبه منقذ رقاب قد بغى السيف بترها بالجاه والمعروف يفرج كرايبه متواضع للناس يقضي لزومها العود والمحتاج يقضي نوايبه وسلطان سلطان السعد ابو خالد فايد جيوش الع والعز جانبه سلطان خير لكل شعب الجزيرة هو عز من حده زمانه وضاقبه يضحك حجاجه كل ماجاه زاير ماقط يوم قيل قطب حواجبه إله يمين تنثر الجود والعطا كما ينثر الماء من مزون سكايبه اسس لنا جمعية الخير كلها هدية للشعب والله جايبه لياعدوا الاخيار نعد نايف اللي عن المحتاج ماحط حاجبه ماقط جاه اللي يبي من حاجه الاوصدر قاضيات مطالبه يجلس بديوانه مع شرقة الضحى ولاينتهي الا عصير والشمس غاربة يعطي العطا مايخشي الفقر مره وعجزت تلحق للاوامر كياتبه وقوي باس وفيه حنكه وحكمه ورايه على كل المشاوير صايبه حما دارنا بالامن وحرز حدودها ومن يخطي السكه نظام يعاقبه وسلمان الصخا رمز الوفاء دايم العطاء يعطي كما واد من السيل فاض به هو اكرم من وادي حنيفة اليا امتلاء اليا تحدر من علاوي جذايبه تفرح به اللي بالشتاء ترجي العشاء ما عندها ياكود ورعه وشايبه ابو اليتامى والضعوف الارامل ومحرول يزحف ورجليه عايبه بنى ا لهم دور ومكاتب رعايه ومشى مصاريف على الدوم راتبه لو ان حاتم طي موجود بيننا تنازل عن الكاس الذي كان كاسبه واحمد اخو نايف على اللين والقسا ياسعد من صار احمدٍ دوم جانبه ليث وصنديد صخي صميدع هو مزبن اللي ضاهدينه قرايبه هذا ولا ملوك الدار وهمه حماتها وحنا جنود للوطن دوم داربه نمشي براي القايد اللي يقودنا الماجد الاعظم فقمنا بواجبه لهم الولاء منا والاخلاص دايم على الوفاء كل لأهاليه ناجبه يادارنا مالك حلي على الوطى مهبط وحي وفيك اطهر الخلق قاطبه حباك الولي بالبيت والمسجد الذي بناه الرسول اللي من الله ناجبه وحباك الولي من اسرة تعرف الهدى تحكم بشرع الله وللحكم صايبه على العز يأدار لها قرن قد مضى دار على الشدات دايم يلاذبه على العز دمتي دايم الدوم دايم بحكم السعود وهم لنا من وهايبه على العز يام ربينا بحجرها هي امنا وإنجت ليال الشلاهبه نعادي معاديها ونحب محبها ومن هقوته نفسه نتفنا شواربه نطمن الراس الذي يرتفع لها وناطا على راسه ومتنه وغاربه واصلي صلاة عد من حج واعتمر على النبي اعداد ما شمس غايبه

العقيد/ ناصر بن ضيف الله العركي
قوات الامن الخاصة