مية سنة واليوم هذ كملها
مية سنة وحكامنا حاكمينه
مية سنة متواصلة في عملها
من يوم ابو تركي حكمها بسنينه
ما تخلله فجوة ولا احد دخلها
الشكر للي كلنا عايدينه
ارسل لنا صقر الجزيرة بطلها
وحدد جزيرتنا بيد متينه
عبدالعزيز اللي بيده شهلها
الشر راح وعزه الله بدينه
عبدالعزيز اللي حماها لهلها
عبدالعزيز اللي بناها بسنينه
اسس مراسيها وسكر خللها
وبعد التفرق صار شعبه عوينه
ساد الامان وكل فتنة قتلها
واضفى علينا الامن امن وسكينه
مرحوم يا عود بعطفه شملها
يعطف عليها لون عطفه لعينه
اوفى وخلف والمواجب عملها
وخلف اسود يخلفونه بدينه
وخلف لها نسل الحرار بكملها
منهاج عدل كلهم مقتدينه
آل السعود اللي عريب سللها
ماكر حرار اصولها معربينه
يمشون في خطة حكيم فتلها
يمشون في نهجه وهم تابعينه
الدار ما للدار ياكود اهلها
آل السعود اللي تقود السفينة
وتسلم العاهل سعود وحملها
وأدى الامانة من يدين امينه
وتقبل البيعه بنفسه قبلها
وعطى لها جهده وخافي كنينه
ومن بعده الفيصل بعلمه صقلها
وذلل جميع المعضلات الرزينه
واصل مسيرة رفعها ما جهلها
وحتى رقت لأعلى المراكز حصينه
ويوم استلم خالد بعطفه حفلها
عليه رحمة ربنا والسكينه
تفتحت ابوابها ما قفلها
للطيب والاخلاص يندى جبينه
للشعب يعطي والارامل كفلها
يشهد له التاريخ مدة سنينه
ونعم نعم صار الفهد هو بطلها
واخوانه اللي رافعين يدينه
وفي عهد ابو فيصل بالاعلى جعلها
وفي عهد ابو فيصل جعلها جنينه
طور وعمر والمصالح بذلها
يعمل بجهد سلم الله يمينه
هذي مشاريع وهذي فللها
وهذي مزارع حبها حاصدينه
وتقدمت المملكة في كملها
هذا يقوم وذا ترى مكملينه
الخير عم وكل قرية وصلها
في كل مضرب قرية او مدينه
هيا شباب اليوم انتم مثلها
هبوا طريق الخير يا ناشدينه
كثرت لكم خيراتها يا بعلها
من دون جهد علمكم ماخذينه
نرجو ثمار بفعلكم نحتصلها
تمشون في عز وحياة امينة
انتم شباب اليوم وانتم اهلها
انتم اهلها وذخرها عارفينه
ناضت خواطركم وحقق املها
تعليمكم زاد وتطور خزينه
بالدين والتعليم انتم كللها
هبو لتعليم تفجر كنينه
فيها معاهد تعجب اللي دخلها
في كل ما ينفع لكم دارسينه
وفيها علوم طيبات خصلها
تعليم طب وهندسة فاتحينه
وتريحت نفوسكم عن وجلها
جابوا لكم كل العلوم الثمينه
وحتى الرعاية للتطور نقلها
تبني وترسم خطة معتنينه
اسس مباني شامخات صقلها
اليا انتهت يشرف عليها بعينه
ولي العهد واصل بوده شملها
متبرع بنفسه عسى الله يعينه
يعمل بجهد ومخلص في عملها
ونقطف ثمار اسستها يمينه
والنايب الثاني ترا هو بطلها
يبني جسور شامخات حصينه
اسس جيوش المملكة في كملها
والكل بفعاله ترى شاكرينه
ساد الامان ابحرها مع سهلها
امن وسلام وعيشة مرتضينه
واليوم يا شعب الجزيرة وهلها
تكاتفوا ضد العدا والضغينه
من رادها بالسوء ياخذ بدلها
شعارنا بالله لازم ندينه
وحكامنا بالعز هذا مثلها
من دونهم ارواحنا بايعينه
