يقول اللي تهيض يوم كل في منامه نام
يهيض ما طرى في خاطره من زين الالحاني
يحسب اللي مضى له من سنينه كم هي من عام
ثمانين وثلاث سنين ما فيهن جحداني
عسى ربي يتم ابها علينا نعمة الاسلام
بظل الله وظل ملوكنا ذربين الايماني
عساه يدوم حكم ملوكنا مع دورة الايام
ملوك حكمهم بالشرع ما غيره حكم ثاني
ذخر عبدالعزيز اللي حكم بالعدل حكم تام
حكم كل الجزيرة لين ثبتها بالاركاني
رسى حكمه على عز ومعزه واستقام وقام
نصره الله وذل عداه وأخزى كل شيطاني
تذكر في شبابه حكم ابوه وجده الحكام
وقال الحكم ما يعطى ولا ينباع بأثماني
تفكر واستخار الله وعمم بالهجوم شمام
مهوب مخلي الحكم مع طامع وقو ماني
معه ربع مشاكيل حزام له ياوي حزام
قليلين العدد لاشك بالهدات ظفراني
ضوى في ليلة غدرا وخطط خطته مانام
دخل في ساحه المصمك يبي يسطي بعجلاني
طلوع الشمس حصل مطلبه وارتفعت الاعلام
وجاوبه المرحّب مرحبا من غير سفهاني
تهني يالرياض وغطر في يوم حظك قام
حكم عبدالعزيز وقام حظك والسعد باني
شهر شوال من تسعة عشر تشهد به الاقلام
وقرن اربعطش هجري وهذا دوره الثاني
حكم خمسين عام زودها عام وثلاث اعوام
وعاش الشعب في حكمه وهو آمن وشبعاني
ظفى حكمه على انحاء المملكة بالخير والانعام
جمع شمل القبايل لين صاروا صف واخواني
وعند الموت ودعها عياله والعيال فهام
تواصوا بالوصات وكل منهم يزهم الثاني
عساه بجنة الفردوس في منزل شرف واكرام
مع الاخيار والابرار بالفردوس سكاني
حكم عقبه سعود ولا تردى مشبع الايتام
وعقب سعود فيصل كلهم مهمب ردياني
حكم فيصل وصارت له ذلول وقادها بخطام
إلى شافت صليب الرأي مثله رأسها لاني
صليب الرأي فيصل ضد من عاداه والاخصام
خصيمه يترك الحجه يدور منتج ثاني
حكم خالد عقب فيصل بجمله ما ينوبه قام
إلى نفذ مشاريع تتم بغير نقصاني
عقب خالد تولاها فهدنا حاكم إمام
حكمها بالعداله والعداله تصلح الشاني
إلى نفذ مشاريع بدرب الخير ما ينلام
مثل مشروع توسعة الحرم والمسجد الثاني
بمكة والمدينة باذل جهده بكل اسهام
يدور راحه اللي من بعيد الدار له عاني
أبو فيصل إلى جاء العلم ضيم الضد ما ينضام
حريبه ما يعين خير يرجع منه خسراني
ولي العهد عبدالله عضيده صامل جزام
يحل المشكلة بالسلم دون سلاح وسناني
وإلى منه تعقد حلها يدحم يجنب زحام
بسيف ما يخلي الرأس يركد فوق الامتاني
ابو متعب صليب الرأي رأيه محكمه بضرام
على رأي الفهد رايه ولا احد ينقض الثاني
وأبو خالد تراه النايب الثاني بغير أوهام
عضيد للثنين بماقفه ماهوب تعباني
ولد عبدالعزيز مسجل التاريخ والارقام
ابوه مسجل فعل الشجاعة باسم سلطاني
على كبد الحريب احمى من المله سمٍ سام
حريبه ما يذوق النوم طول الليل سهراني
ذخر عبدالعزيز اللي ذخرهم نصرة الاسلام
على السنة وشرع الله لهم منهج وميداني
على التقوى وحكم الشرع بالله كلهم قوام
عدو الدين هم ضده ولا له عندهم عاني
ملوك عزهم ربي كريمين السبال كرام
بخدمه شعبهم ما قصروا في كل الاوطاني
عسى من مات منهم يدخل الجنة على الاقدام
عساه بجنة الفردوس مرتاح وفرحاني
على المختاراصلي في ختامي والسلام ختام
عدد ما ناحت الورقاء وهزت خضر الاغصاني
