تصوّر.. ما رضت عين الرضا بعد الجفا تبكيك

تخاف الدمع يغسل صورتك وتغيب عن عيني

حبيبي لو رحل صوتك بعيش الحاضر بماضيك

صدى الذكرى.. ولا واقع يفرّق بينك وبيني

أحسب انك متى ما غبت عن عيني قدرت اجيك

تسرّب كيف حلم العمر بين أصابع يديني

ولو ضاع الرجابك يا رجايه.. مالي إلاّ أرجيك

تصوّر.. ما تصوّرها حياتي لو تخلّيني

ولو سيّل سحاب الوقت نجمه وانطفت بيديك

حبيبي.. لا يسيل النور من عينك وتبكيني

مثل فرحة زهور الليل بالظلما.. ابفرح فيك

سواد الليل بغيابك على حزني يواسيني

عرفت أموت لجل أعيش لعيونك.. وأموت أبيك

تشوف الموت في حبك حبيبي كيف يحييني

أمانه.. لا تظن اللي عطيته عاجزٍ يعطيك

وأنا اللي في رجا ليلة رجوعك ضاعت سنيني

حبيبي.. لو تجاعيد الزمن خطّت وجه مغليك

أنا عندي يقين إني مثل ما اغليك تغليني

**

- الأمير د. سعد آل سعود