هاجسي وان كان يمديك هات ومدني

القصايد له مواعيد مع موعودها

لي ثلاث شهور يالشعرشيٍ ردني

والعرب قالت ترى الجود من موجودها

جيتلك من ضيقة البال واللي حدني

امر يقهر رغبة النفس عن مقصودها

شيلني ياطاري الشعر عنهم ودني

عن سوالف مالها طعم نقصٍ زودها

مابنيتك يابن الاجواد لاجل تهدني

ولاكسبت بسجة الرجل غير لهودها

الزمان يشدني شد وانت تشدني

الذخيره ثوّره شي من بارودها

الديون اكثر من البذل ولاحدن سدني

والمعرفه ام ثكلا قتل مولودها

وانت ياللي ساكن هناك ظرفي صدني

لا تنشّدني عن اشيا حفظت سدودها

الاجابه عاقبتها سهوم تضدني

والحقيقه تنتظر دوم صوت شهودها

عدني ضيفك من اليوم والا عدني

واحدٍ يرقب من البعد صوت رعودها

المسافه تقطع القلب وطوله كدني

والصحاري كلها جرد يابس عودها

بين حظي والمشاريه وقتي مدني

اتقرب واثر الانذال هذا فودها

النوايا تدفع القلب ولاحدن ردني

ماانتبهت الا وانا هناك خلف حدودها

السعاده شي ملموس وانت تودني

والقصايد ماتربّحت من مردودها

اشعله من شان الايام يوم تعدني

شاعرن صحى القصايد بوقت رقودها

يوم نادى هاجسه قال وينك مدني

قال انا موجود والجود من موجودها

** **

- سعيّد العمودي