يا سحايب شعوري مات عرق الجريد

مانهمر وبل غيثك صار له كم شهر

يسألوني كثيرٍ عنْك وين الجديد؟!

ما دروا بان دمعي لانسكابك مهر

وأنت بردك عنيف مثل صخر الجليد

يفرح اللي يمرك يحسب إنّك نهر

والليالِ طويله والضياء فجر عيد

وعقرب الوقت يزحف والثواني دهر!!

ساحة الحرب في صدر الكتوم العنيد

دبك خيل ٍ تغير ودبل كبد وسهر

ما يزعزع ثباتي غير باسٍ شديد

وما يحطم شعوري غير غبن وقهر

لو تمادى بجوره قلت هل من مزيد؟!

جاير الحمل عندي مثل قطف الزهر

الليالي تعاقب والتجارب تفيد

يا زمان العجايب وش بقى ما ظهر

بين نقض الجروح وبين نظم القصيد

جمرة من لهيب القيظ عز الظهر

تحرق عروق قلبي لين صِبْت الوريد

ويش ذنبه وهو مخلوق طيب وطهر!

جيتك بكف تحمل كل عمري رصيد

كيف شالت كفوفك خنجرٍ بالظهر!

** **

هيلة آل سليم - شواهق نجد