الموضوعات الأكثر
يا وقت لو نشكيك في روس الطوال
شكواتنا من شوق ماهي من شجون
أبشرك عن حالنا بأتم حال
وامورنا زينة من أحسن مايكون
ما نشتكي لو عجّز الحيل المُحال
أحلامنا مامات أحد منها ْمغبون
أمّا ركض من خلفها ركض الرجال
ولاّ صبر والله مع اللي يصبرون
كم ضاقت الدنيا على عيال الحلال
ولا اشتكوا منها ولا هم يحزنون
تقبل ولو تقفي بها سود الليال
عوايد الدنيا لها شكلٍ ولون
يبغى لها صدرٍ وسيع وطول بال
وإيمان باللي له عباده يسجدون
من لا جمع تقوى ولا شد الرحال
والله فلا ياصل مع اللي ياصلون
لاصار مايسري إلى شاف الخيال
ولا جهم للعز مع من يجهمون
قل له يراكي بمجلسه ام العيال
يوم النشامى للمعالي يصعدون
المرجلة ماتنشرى بخشم الريال
لو ان ربعه يذبحون ويسلخون
حتى المعرّب من عمام ومن خوال
لا صار ماهو كفوهم مايرفعون
يا مكبّر الدعوى وهي مثل السهال
جردا وتقطعها الركايب والضعون
لا يخدعك راع النميمة ويش قال
ولا تحتري من غير رب البيت عون
ولاتقول فلان شيال الثقال
الا عقب ماتشوفهن فوق المتون
ولاتنصح اللي مايثمن لك مقال
نصح الجويهل فيه ضرب من الجنون
خلّه يقلّبها على سوء المآل
وأذكر ترا لله في خلقه شؤون
واحرص لاتمزح مع سريع الإشتعال
أهل الصدور الضيقة مايمزحون
وراع التشرّه والعتب والإنفعال
لا يتبعك لو ريحته عود ودخون
ولا تعطي الكذاب بالخوة مجال
تقرن معه لو كنت ممن يصدقون
ومن لايبادلك الوفاء شف له بدال
خله وتلقى لك رفيقٍ مايخون
ولاتمدح الهافي وتهديه الجزال
ترا الرجال إلى مدحوا مايكذبون
ولا تفرح بمجدٍ يجي سهل المنال
إتعب ترا عصم الشوارب يتعبون
لاتنحني مكسور إلا بإبتهال
إبك وتضرع للولي ولا تهون
رزقك لو إنه في شواهيق الجبال
يسوقه الله لك مثل سوق المزون
احدٍ إلى منه ورد يشرب زلال
يروى ويروي ربعه اللي يحترون
واحدٍ يحط سهيل مع نجم الشمال
غادي وماتنفع مع الغادي عيون
المهرة اللي ماتضرّا للدلال
ماتهقوي الخيّال في دك الحصون
إن ماعسفها لأجل ساعات النزال
تورده حوض الفشايل والظنون
والهدّة اللي ماتغدي مضرب مثال
احسن لها تمرح مع اللي يمرحون
من قبل لاتبقى معه طول الليال
جمرة غبن بين الحناجر والجفون
** **
- متعب النصار الشراري