سلام يالعاهل ولد عبد العزيز الإمام

شام الحكم عن غيركم واعطى لك زمامها

يابوفهد معطينك البيعه بحرب وسلام

واجب علينا نقتدي بك وانته أمامها

يابن الزعيم اللِّي تعلاَّ كل عالي مقام

يوم احتزم للمُلك شد الرسن واخطامها

أجدادك ملوكٍ محت عهد الجهل والظلام

واشعارها التوحيد والدستور في اسلامها

قامت من العوجا بليا شك واللاكلام

لين وصلت لك وانت يا سلمان مقدامها

فقدها مسيرة وابشر بالسعد والهمام

كل المصاعب تنتهي قدام عزّامها

قم بالعدل وابشر بملكٍ ينتصر ما يضام

وعد الله اللِّي شرّع الاديان واحكامها

عهدك يسجل للوطن مسك الحكم والختام

هذاك أخو نوره بداها وانته ختامها

فمن يشعل الفتنه فلا له غير حد الحسام

امر عليه السيف بأمرك عجل عدامها

ولا تسمع الاشوار فيهم حل والا حرام

اقضوا على الفتنه قبل تستقوي اعظامها

انتم هل العوجا منزحة العداء والخصام

من فعلكم عدوانكم عضّت على ابهامها

** **

- محمد بن عبدالرحمن الصفيان