تربط الشاعر المعروف حسين بن فهد القحطاني صداقة وتقدير متبادل بالشاعر والإعلامي شبيب بن غزاي المطيري -رحمه الله وهاتين القصيدتين المتبادلتين كانت آخر ذكرى بينهما مؤخراََ وقد تضمّنت القصيدتين الإشارة إلى صديقهما الشاعر العذب متعب التركي:

يا حي شوف الرياض وحي طاريّه

يرتاح له قلبي الولهان لاضاقي

ياحسين سلّم على خزامى ولوبيّه

يا بوفهد بلّغه في حر الأشواقي

تمر الأيام بعض أحيان عاديّه

وأحيان ياحسين مايبقى لها باقي

والشعر وان دار فكره يم ماضيّه

قام يتذكّر طواريقه ويشتاقي

اللي لها في ضمير العشق ماريّه

تسلب عقول البشر في بوحها الراقي

هناك وهناك فيه أمور سريّه

عفا عليها الزمان وشق الأوراقي

- شبيب غزاي المطيري

يا مرحبا عد ماهلّت مناشيّه

ياصاحبي طيّب المبدأ والاعراقي

راحت سنين العمر مراح عصريّه

وماباقي إلاّ أتخيّلها بالأحداقي

وراحت رجالٍ على الطالات مسميه

ياوجد قلبي عليها كل مافاقي

أحيان تخنقني العبره علانيّه

لو طعت ذي العين صار الخد به ساقي

شبيب لاتزعج الذكرى في هالجيّه

أحيان بعض التذكّر صعب ينطاقي

أمانتك لاوصلت الحفر بوصيّه

سلّم على متعب التركي بالافاقي

** **

- حسين بن فهد القحطاني