في البال سجّة عبدلي ماله أرباح

إلاّ غناة الروح من ورث جدّه

وين أنت ياللي للسواليف لمّاح

تاخذ كلام الحال والا تردّه

ماهمني من باقيٍ لي ومن راح

بين البيوت العامره والإشده

إلا ازرقٍ من نايد الناس مزّاح

الله على مزحه وضحكه وجدّه

هذاك ياقربه من القلب ياصاح

لو المسافه عنه تسعين شدّه

عرفت منه ان الغلا وصل الارواح

وعرفت منه ان القرابه موده

لو راح غيره قلت مذلاف وضّاح

مانيب قايل: جعل ربي يرده

ولو طاح من عيني عزيزين ماطاح

وياكثرهم من زدت بعده بصده

لليوم عندي من هداياه مسباح

ولليوم عندي من خطاياه وده

لاتقول لي وشفيك؟.. مانيب مرتاح

جالي على هالحال ياخوك مده

إمّا يجي للحظ بابٍ ومفتاح

والا عسى الأيام ضيقٍ وشده

ماغرّني في صادق الطلع ملواح

لي من وراه اليا صفا الجو هدّه

ولانيب محتاجٍ من الناس مصباح

لااعجبني الطاروق عندي مشدّه

لي مع هل الردّات نوهه ومرواح

ولي مع هل الردات لاجيت ردّه

هذا مكاني بين هاجي ومدّاح

موجود لي وإن غبت ما احدٍ يسدّه

** **

- هلال المطيري