يا سائلي وش ودّك اتعرف وتضيف

قل لي واقول الك البراهين شفها

على شموخ العز بصمة وتشريف

مكانةٍ ربي وهبني شرفها

والمفردة في كل نصٍ وتصنيف

أشوم عنها كان غيري عسفها

ما أحبها بالكم عشقي لها كيف

والشاردات أطرب لها لاقطفها

فكرٍ يوظّف جوهر الشعر توظيف

شواهد المعنى الثري ماحرفها

والغايه اللي سرّها بالسراجيف

من عنفوان الذات تأخذ ترفها

هقواتها ماهي على جرفٍ مهيف

من قمّة طويق المسمّى طرفها

ماجا.. لها في ملتقى الطرق توقيف

على مسار العز يسمو هدفها

مضمون ماتحويه مافيه تحريف

وانا لها رغم السنين.. وكَلَفها

مادق هاجس خاطري بالمناكيف

عنها.. وعز أحلامها ما جرفها

تيار رأي مضيعين المعاريف

وكثرة وعود العاجزين.. وأسفها

هذا وانا لو خاطري شفق.. ومعيف

ماالغي مشاريه العرب.. وأحذفها

الحق سيف.. ومصدر الباطل اضعيف

والنفس عند اللي خلقها.. نصفْها

ومشاعري مهما تصير التكاليف

بيضٍ على طول الليالي صحفها

** **

- فتاة نجد