على العز ياقلبٍ تقسّمت بين الناس

وانا عارف انك تنصدم نوب وتعاني

تصالحت معك وطبت لك والقلوب اجناس

وحاولت أبرهن كل نبضك على لساني

على شان أبيّن للبشر لذّة الإحساس

بان التسامح حلو وان العمر فاني

لو انك جزوع ان لاعك الهم والهوجاس

تخيّرت وكرٍ تنعزل فيه وحداني

ولو انك تضيق احيان من بارد النسناس

وعن مجامل أهل الزيف والمكر تنهاني

وانا اصهر عروقك مثل صهر الذهب والماس

وانقيك عن سخف الشوايب والادراني

اعيّشك في كبر التواضع طناخة راس

وتعطي دروسك لاهل الكبر مجاني

عسا الله يحفظك من غثا الحقد والوسواس

ويجري تسامح نبض صدقك بشرياني

كتبت إلك شعرٍ منخلق لجله القرطاس

وسقيتك معاناة الليالي والأزماني

ولو ان الحكايه عشق للحبر والكرّاس

مايمدي قلوب الناس بالصدق تقراني

مامرّيت في قلوبٍ تبيني وانا عسّاس

وابلقى قلوبٍ مثل قلبي تحرّاني

وانا اشوف وقتي يقرع لحزني الاجراس

وتلوّح كفوفي للزمان وتعدّاني

لكن العوض في قلب مايشكي الافلاس

لو انه يحس احيان ويضيق ويعاني

** **

- علي الريض