يطيبن الجروح وجرح قلبي ني

على اللّي لاطرى الطاري تمنيته

صغير وقد شرق لي من شعاعه ضي

عسى يخليني الله كان خلّيته

غدا بالحسن ثم أعطى الغزال شوي

الا ليته عطى غيره الا ليته

شبيه الشمس والا الشمس كنّه هي

لك الله ضاع صيت الشمس في صيته

ذبل ورد الربيع وفي خدوده حي

كسر بالرمش فوقه يوم راعيته

نقض ليله حرير وشي يلمس شي

طرق فيه النسيم وزاد تنهيته

ضحك لي يوم دنّق كن ماهو لي

وانا لولا كلام الناس ناديته

هلابه من طوى حال المعنّى طي

كثر ماكان غايب لين لاقيته

عطيته قلبي وروحي وعيني ذي

واحس اني بعد للحين ما اعطيته

** **

- عبدالرحمن عادل الشمري