ازعل وترضيك الليالي والأيام

ماجاك منَّا شيء يزْعلْك منَّا

يغرّك التفكير في بعض الأوهام

وتشوفنا مخطين وتصد عنّا

لاتحسب إنّا للمقفِّين خدّام

من يتبع المقفين ماهوب حنَّا

مالك علينا حق في وصل الأرحام

عشان نمشي لك على ماتمنَّا

كنّا نعدّك بالقسا درع وحزام

والله يسامح وقتنا يوم كنّا

الطيبين الهم مع الطيّب إلزام

والرفقه الّلي حبلها مَاتثنَّا

لكن إليا شانت على كف لوّام

اللي مايبدي رفقته ماشحنَّا

سلومنا ماهي بسلعه لمن سام

حتى يبيع حقوقها عفش دَنَّا

والروح تظهر والجسد جلد وعظام

والنفس من يتبع هواها امعَنَّا

** **

- سلطان بن بشير