مانيب عن هرج المعادين نشّاد

عجاجةٍ جانا المطر من وراها

وإن جدّد الظالم مزاعمه وش عاد

هذا هوى نفسه وهذا جداها

ماتصلح الدنيا بلا صبر وعناد

ولطم الخشوم وردَّها عن هواها

أنا أشهد إن بلادنا المملكة بلاد

ماأعظم مكانتها وما أطول مداها

يامحمدٍ حيّيت يانسل الأجداد

جمرة هل العوجا وشعلة ضياها

ويامحمدٍ حيّيت من روس الأشهاد

بقولها وأفرح بردّة صداها

حنّا نشوف الصبح من قبل ينقاد

في مفرقك والشمس غضٍّ سناها

نحتاج لك روحٍ ونحتاجك فؤاد

وتحتاجك أرضك يا معمّر ثراها

لايكدّرك يا أمير فاجر وجحَّاد

بعض النفوس إبصارها هو عماها

وإلى رضى سلمان يحتجّْ من راد

ماجيت خلق الله تدوّر ارضاها

والله فوق الكل فحماه نزداد

عزٍ وتهنى المملكة في رخاها

** **

- الأمير بدر بن عبدالمحسن