مدري وش اللي جابني صوب الشعر

يمكن كثر ما اغليه اخذ مني غلاه

ابيه يعذرني وانا كلي عذر

للي سرق مني حدود الإنتباه

بين العطور ومر من جنبي عطر

يفتح شبابيك الهوى نسمة هواه

كن الأماكن يومها غيم ومطر

وكن السحاب ارخص بذاك اليوم ماه

الله عطاها غير عن كل البشر

والله ليا منه عطى عبده عطاه

هذي هي اللي اسمها فرصة عمر

كل الذي ضيعتهم قبله فداه

يالله كثر ما اعطيتها عطني صبر

الزين يتعب صاحبه كانه بغاه

جربت خذلان الأحبة والسهر

وسامحت هقواتي وسامحت الحياه

الناس بالدنيا تخاف من الفقر

وانا اخاف من الطمع بعد الغناه

** **

- أحمد مروي السديري