معك واشتاق لك وشلون وانا بعيد

والمشاعر ضوامي غصب تنساق لك

كل ما ابطت بك الأيام شوقي يزيد

شف جنون الغلا عقبك وأنا عاقلك

فيني شعور أحسّه نابع من الوريد

من يلوم الخفوق إن صار خفّاق لك

ريف قلبي ومرباعه وشوفتك عيد

انت مثل الهواء وارضي والآفاق لك

احترق لك وَلَه والاّ انكتب لك قصيد

والشعر كم تباهى كل ماراق لك

من وداعك ونظراتك رمتني وحيد

غربة شعور يآخي هالجفاء لاق لك

إيه أحبك وأحبك وهمّ احبك واعيد

وحالتي شسمها والقلب توّاق لك

شوق لهفه ولَه، دوّرت مابه جديد

ودّي ألقا كلام أكبر من.. اشتاق لك

** **

- حمد السعيد